Popepi nomisiuma yaNakambale nomavululukilwohala, opu na omahala ogendji omawanawa.
Omahalatumo omakulu oga li ga tungwa popepi nomahala gaaleli yoshilongo. Ombala wo yomukwaniilwa gwaNdonga, omukwaniilwa Immanuel Kauluma Elifas, nayo wo oyi li popepi nomisiuma. Omukwaniilwa Immanuel Kauluma oku li omuyambidhidhi omunene gwomisiuma ndjika pamwe nomukulukadhi gwomupresidente gwotango gwaNamibia meme Kovambo Nujoma nosho wo omukulukadhi gwomupresidente gwaSuomi, meme Eeva Ahtisaari.
Omisiuma yopaunamiti yaNandjokwe oye egulukile momasiku sho ga li 22 gaMaalitsa 2013. Omu na iiulikwanima tayi kalelele mbyoka hayi ulike ondjokonona yoshipangelo pethimbo lyekondjelomanguluko. Omu na wo oshikunino shomiti dhopamuthigululwakalo, shoka
hashi ulike nkene iimeno hayi longithwa ongomiti dhokupanga. Momumvo 1911, omundohotola, nomunambelewa gwuunamiti, Omusoomi Selma Rainio (Gwanandjokwe), okwa li a toto po oshipangelo shaNandjokwe, nosho sha li oshipangelo shotango mOnooli. Pethimbo
lyekondjelomanguluko, osho ashike sha li po shi na okatopolwa (ICU) kokukwathele aavu mboka taya ehama unene.
